Ceallaigh Scéal Ón mBlár Catha – rLeabhar

Is beag é fáilte Shéamais S Uí Cheallaigh roimh an nóta grod óna eagarthóir ag ordú dó teacht chuig a oifig. Tá sé le cur go Cúba, deirtear leis, chun tuairiscí ar réimeas Castro a scríobh don nuachtán. Ach bhí comhainmneach ann roimhe: James J O’Kelly, a thuairiscigh ar chogadh na saoirse i gCúba i lár an naoú céad déag. Is gearr go mbíonn an dá Cheallach seo ag trasnú a cheile, ag dul isteach is amach i smaointe agus gníomhartha a chéile. Is deacair an teorainn idir Cúba an lae inné agus Cúba an lae inniu a dhéanamh amach, go minic. Is deacair a bheith cinnte, go deimhin, an bhfuil a leithéid de theorainn ann…

Úrscéal eile ón Síomónach a dhiúltaíonn cloí le seanrialacha an chluiche. Insíonn sé scéal atá lán le heachtraí taibhseacha, ó Éirinn go Cúba, ón am a caitheadh go dtí an t am i láthair, ar bhealach spreagúil tarraingteach a dhúisíonn ceisteanna tábhachtacha do-sheachanta faoin saol.

Níl i gCúba ach ceann amháin den iomad tíortha atá siúlta ag Tomás Mac Síomóin, Bleá Cliathach a bhfuil cónaí air i mBarcelona. Bitheolaí, file, iriseoir, scéalaí, tráchtaire agus tuilleadh is ea é. Is iomaí gradam atá bronnta ar a chuid saothair, agus níos tábhachtaí fós, is iomaí duine a fuair lón machnaimh uaidh.